Niri buruz

Mikel Lizarralde daukat izena, 1980an jaiotako eibartarra. 2018 hasieran esklerosi anizkoitza diagnostikatu zidaten.

Diagnostikoa

Hemen kontatzen dut nola diagnostikatu zidaten gaitza. Labur-labur: mendian korrika nebilela bikoitza ikusten hasi nintzen; Mendaroko ospitalean probak egin zizkidaten eta orban batzuk agertu ziren buruan; puntzio lunbar batekin likido zefalorrakideoa atera ostean, konfirmatu zen esklerosi anizkoitza dudala.

Gaur egungo egoera

Bada, hemen eta orain, ondo nago. “Bizitza normala” daramat. Astean behin Avonex izeneko botika bat hartzen dut, gaitzak lokartuta jarraitu dezan. Ahalik gehien zaintzen dut nire burua, kirola eta dieta baten bidez.

2018ko irailean dieta aldatu nuen eta kirol gehiago egiten hasi nintzen. Momentu horretatik aurrera asko hobetu zen nire egoera fisikoa eta aldartea. Burua bera hobeto igartzen dut geroztik.

Zergatik erronka hauek?

Lorpentxoek lagundu zidaten aurrera egiten, nire burua hobeto ikusten eta apurka-apurka egoera fisiko ona berreskuratzen. Bestalde, ospitalean nengoela pentsatzen nuen pena neukala zenbait kirol-proba ezingo nituelako egin.

Horregatik, hobeto aurkitzen hasi nintzenean Zegama-Aizkorri bezalako erronketan pentsatzen hasi nintzen.

Webgune honen helburua

Zegama-Aizkorri egin nahi nuela Twitterren esan nuenean oihartzun handia lortu zuen. Euskadi irratitian elkarrizketatu nindutenean ikusi nuen esklerosi anizkoitza ezagunagoa egiten lagundu nezakeela. Horra hor webgune honen helburua.

Ez nator leziorik ematera, ezta eredu moduan jartzera ere, nire istorioa kontatu nahi dizuet, besterik ez.

Hitzaldi baten bideoa

2019ko martxoan Eibarko Klub Deportiboan hitzaldi bat eman nuen “Esklerosi anizkoitza, kirola eta bizipoza” izenburupean. Hemen ikusi daiteke: